原本只有一間快餐店，一間小食，同埋一間酒樓；依家呢……快餐店打算做到下年二月唔再做，咁佢樓上開左間新既餐廳（？）有點心，有炒野，但係勁貴之餘又坐得唔舒服，應該唔會幫襯佢，又多左間七仔，遲下仲有間咖哩店同埋壽司店 ……
間快餐店由我小時已經係度，都可能有廿幾、三十年吧 ……
老實講，佢 d 野真係無以前咁好食（都仲好食過大家 X 或者大快 X )，但係佢摺埋之後，真係唔知去邊買飯盒 …… 唔通真係要去七仔買叮叮飯盒，或者食貴價炒粉麵？依家好多時都係快餐店買早餐，第日去邊度食好 ……
雖然唔係餐餐係果度食，但係我估我會好懷念我好多時都叫既果份早餐：紅腸米粉加炸菜，跟餐仲跟個火腿/餐肉煎蛋同凍檸茶 ……
咁多年，佢都有好幾味好合心水的食物：
早餐：紅腸米粉加炸菜，跟餐仲跟個火腿/餐肉煎蛋同凍檸茶，我估我鐘意食佢係因為佢用既炸菜真係好正！
咖哩牛腩飯：佢做既咖哩比較特別，味道同街外既好味同，唔會好辣，但係味道好香濃，出面好難食倒，只係銅鑼灣食過一次同味道的，但係果間野就好貴……
會意粉：佢先用茄汁炒過 d意粉，再焗住保持熱度，因為咁，佢既意粉會有少許「脹」但係，就好合我口味，可能因為焗住保熱既關係，茄汁好入味……
楊州炒飯 / 西炒飯：一個好普通，但係真係炒得好好味、好有口感！
新既中式餐廳：開左兩個星期左右，聽倒既都係負面既野，點心，價錢上平左，六蚊，但係據講，燒賣，得果兩粒（半籠？），咁同我地條村間酒樓賣十蚊一籠既叫燒賣比，咪仲貴左？其他炒粉麵都要三十幾、四十蚊 …… 依家快餐店都係最貴都只係三十蚊之嘛！座位呢……據說好逼，話哂都係餐廳，點知仲逼過樓下間快餐店？所以，都唔會有機會去食野架啦！
咖哩店：好唔明，一個屋村有幾大呢？而且我住果度仲要唔係幾個屋村相連果種，人少之餘，仲要唔會成日食咖哩吧 …… 點生存呢 …… 雖然，依家唔少小數族裔搬左入來，但係唔覺得因為咁會多左幫襯既人！
壽司店：同樣道理，唔會日日食壽司，而且，一條村，估計後生仔佔五成好未？都唔會日日食，入得幾多貨呢？幾耐入一次貨呢 …… 我會去葵芳食囉！起碼葵芳人流較多，魚貨會去得快點，會「新鮮」一點吧 …… 不過，由於近學校，估計日間都會有些生意吧，但係入夜……，我覺得佢會拍烏蠅囉！
唉！以後如果屋企唔煮飯，唔通真係次次叫 Pizza Hut？
．Henry's 某個角落． 